HAJAJADI NI TAO TOBA

Posted: 27 July 2010 in BATAK

Hajajadi ni Tao Toba

Di toru ni dolok Pusuk Buhit adong ma najolo sada baoa na so marnioli dope na margoar Juara Dungdang. Pardengke do ibana. Di na sadari dipauli ibana ma sada bubu na balga situtu. Alai dung ditaon, ndang olo dapotan. “Na mabalgahu do ra”, ninna rohana di bagasan. Jadi naeng ma pametmetonna bubu i. Alai adong ma ro soara tu pinggolna mandok “unang”. Sundat ma dipametmet bubu i, jala diulahi ma ditaon. Marsogot na i ditingkir ma bubuna i. Tarsonggot ibana mida na dapot bubu i, ai diida ma dengke apala na bolon. “Nga jea on”, ninna rohana. “Sian dia do ro dengke na saon bolon tu binanga na saon metmet?” Ala ni biarna ndang dipatuduhon be dengke i tu manang ise, alai ditabunihon ma i tu sopo.

Marsogotna i ditingkir ma muse dengke i. Hape diida ma naung gabe boru-boru na uli do dengke i, jala angka sisikna gabe ringgit. Ndang hapalang las ni roha ni Juara Dungdang marnida boru-boru i dohot angka ringgit i, laos disungkun ma boru-boru i manang na olo do gabe tungganeboruna. Pintor dioloi boru-boru i do antong, alai adong do dipangido sijanjihonon ni Juara Dungdang, i ma : manang aha pe di sogotsogot ni ari na tarjadi di parsaripeon nasida, tung so jadi dohononna boruboru i boru ni dengke. Dung dibulanhon Juara Dungdang parjanjian i top ripe ma nasida.
Salpu sataon tubu ma anak nasida. Alai mansai sengke do dakdanak i gabe sai loja do Juara Dungdang mangkurdohurdohon. Pola do jotjot ibana muruk. Di na sadari manombo ma muse laga ni dakdanak i. Anggo disi ndang haotapan Juara Dungdang be murukna. Gasagasaon ma ibana jala dipandok angka hata na roa tu anakna i. Lupa ibana tu janjina, gabe didokma :”Na so hasea on, tubu ni boru ni dengke on!” Dibege niolina i, do hatana i, gabe dijouhon boru-boru i ma :”E, nunga dilaosi ho janjim. Tinggal ma ho dohot anakta i, laho ma ahu!”

Mangangkat ma boru-boru i laos ditimbung ma tu bagasan binanga pardengkean ni Juara Dungdang, jala ndang tarida be. Alai tongkin i siksak ma hilap, mardoromdorom ma ronggur, madabu ma udan tipotipo, mangullus ma alogo gas andalu, humuntal ma tano dihutur Naga Padoha laos marongrong. Gabe tarjadi ma Tao Toba na uli i.

Comments are closed.